Што ни недостасува за да ги спречиме шумските пожари?

Поговорката дека е подобро да се спречи отколку да се лечи може да се примени и во случајот со шумските пожари во кои годинава изгоре рекордна површина шуми. За да се создадат, да се опремат и да се обучат 50 противпожарни тимови кои ќе спречат да изгорат околу 3.000 хектари шума годишно е многу поевтино и трае многу покусо време отколку да се расчистува и повторно да се пошумува изгорената површина за што е потребно да поминат години. А со климатските промени е многу извесно дека оваа споредба уште повеќе ќе се продлабочува.  За дупките во системот за превенција на пожари и за можните решенија, во овој поткаст разговараме со Цветан Николов, раководител на регионалниот проект за Управување со пожари во отворени предели во Западен Балкан (LFMWB) кој е финансиран од Швајцарската агенција за развој и соработка и во кој покрај Македонија вклучени се и институции и организации и од Албанија, Босна и Херцеговина, Србија, Црна Гора и Косово. За искуствата со пошумувањето на веќе изгорените подрачја што се прави со акцијата „Боренка“ која ја води Сојузот на извидници на Македонија разговараме со извидничката Ева Блажевска.