Episode 548 - ANC volhard met Cyril Ramaphosa vir eers

• Ramaphosa bly

Netwerk 24 berig Cyril is ’n bate vir die ANC en sy posisie is veilig, sê Fikile

Hoewel daar pogings sal wees om die hoofraadsvergadering van die ANC vandeesweek met leierskapkwessies te ontwrig, sal geen ongedissiplineerdheid geduld word nie en is pres. Cyril Ramaphosa se posisie as partyleier veilig.

Dit was Sondagmiddag die boodskap van Fikile Mbalula, sekretaris-generaal van die ANC, op die vooraand van die party se vyfde hoofraadsvergadering wat Maandag in Boksburg begin.

Mense wat nie op die vergadering sal wees nie, ongedissiplineerde en “destruktiewe” ANC-lede en ander teen-revolusionêre magte wat die ANC wil verswak, sal volgens Mbalula woel om skade te doen. Lede wat “oorywerig” is, sal hulle ook daarmee wil ophou.

Mbalula het ook gekap na diegene wat “stories” oor verdeeldheid en faksiegevegte by die media aandra.

• SEB moet bly

BusinessLive berig: President Cyril Ramaphosa sê die ANC is steeds die korrekte voertuig vir ekonomiese transformasie in SA.

“Hernuwing vereis dat ons die organisatoriese kultuur en tradisies van die ANC herbevestig as 'n beweging wat onder die mense gewortel is en hul belange, bekommernisse en aspirasies verteenwoordig,” het Ramaphosa Maandag tydens die opening van die ANC se nasionale algemene raad (NGC) in Gauteng gesê.

• Kritiek op AfriForum van die ANC

Netwerk 24 berig ANC oor sy verlies aan wit steun: Dis AfriForum se skuld!

Die ANC is bekommerd oor die kleiner steun wat hy van minderheidsgroepe in Suid-Afrika kry en meen organisasies soos die DA, die VF Plus en AfriForum is verantwoordelik vir ’n “regse konsolidasie” onder wit kiesers.

Volgens die ANC se besprekingsdokumente vir sy hoofraadsvergadering, wat môre in Ekurhuleni begin, is “regse stemme”, wat meer uitgesproke word teen transformasie, die rede vir sy kwynende steun onder wit kiesers.

“Hierdie (regse) magte het ’n beleg-mentaliteit gekweek en kyk na buitelandse konserwatiewe bondgenote (byvoorbeeld elemente van die Amerikaanse regsgesindes) deur etniese mobilisering te gebruik. Die narratief van wit slagofferskap probeer om die werklikheid te kamoefleer dat wit mense steeds disproporsioneel voordeel trek uit ons ekonomie, terwyl die gesig van armoede en werkloosheid swart, vroulik en jonk bly. Hierdie narratief ondermyn ons pogings tot nasiebou,” lui die besprekingsdokument.